ماشین سازی تبریز کرخاناسی گرک دیریله* نوشته محمد اشراقی
شرقی آذربایجان استانداری بیر نئچه نفرلیک هئیت ایله بیرلیک ده ماشین سازی کرخاناسینی گؤردولر.
بو گؤروش ده استاندار ایشچی لرین نماینده لریله دانیشدی. کارگرلر کرخانانین آرتیق ایشه توشمه سی له یئنی لشمه سینی استانداردان ایستدیلیر. استاندار دا بو ایشه کؤمک لیق ائتمگه سؤز وئردی. ماشین سازی اهمیته یییه اولان بؤیوک آغیر صنعت دیر. بو کرخانا چک سلواکی لار الیله اونلار کیچیک بؤیوک صنعتی محصول قایرماق اوچون دوزلینمیشدیر. ایشین اولینده دئمک ۱۳۴۸ ده کیچیک محصول لارا آیری کرخانالار دوزلیب آچیلدی، ماشین سازی ایسه یالنیز نئچه نوع تراش ماشینی، دریل و نئچه آیری محصول لاری نین یدکی پارچالارینا حصر ائدیلدی. ماشین سازییا ایلک اون ایللیغیندان سورالار، cnc ماشینلاری دا آلیندی. دئمک اولار تکنولوژی باخیمیندان یئنیلندی.
آنجاق بو بؤیوک کرخانا ایندی اؤز بؤیوکلوگو و اهمیتی قدر یئنیلنمک ایسته ییر. بیلن لر باخیب دییه بیلرلر کی ایرانین بؤیوک کرخانلاریندان اولان ماشین سازییا یاخشی سرمایا قویولسا، نئجه و نئچه ایلده منفعت حدینه چاتابیلر. اوزاقدان دئمک اولار کی یاخشی ایشلنیلسه، گون محصوللاری، ایچ و ائشیک بازارلارینا یئتیشسه بیر نئچه ایلده اؤزو اؤزونو اداره ائده بیلر. بئله اولسا داها دولت بودجه سینه آسیلی اولماز.
