هارداسان؟
هارداسان؟
هارداسان ائل لرین دایاغی ؟
پیس گونده یوردلارین ایاغی؟
ائل لرین آغریسی منده دیر!
آغریمین درمانی سنده دیر!
باخیرام ائل لره سن سیز دیر
دوغروسو قوش کیمی دن سیز دیر
الینده ایشین وار اؤتور گل
یولداشین اؤزون له گؤتور گل
قالمیشق بیلمیریک نئیله یک
پیسلیک ده یاشیریق دینمه یک
چوخ یئرده ن دینجلیک کؤچوبدور
دیریلیک ائله بیل اؤلوبدور
دؤیوشور هامی اؤز ازؤیله
اؤلومو گؤرورلر گؤزویله
وئرگی لر ائتگی دن دوشوبدر
اوره ک لر شنلیک دن کوسوبدور
گوجلو لر گوجسوزو چاپیری
بیلن لر بیلمزی سایمیری
تولاییر یالانچی هامینی
قویوبدور ایش بیلن آدینی
ایتیبدیر دوزلوگون یوللاری
دئییشیب پیس یاخشی دونلاری
گلنده اؤزونله گتیر عقل
نقیلین یئرینه یئتیر عقل
تانییاق پیس ایله یاخشینی
آرییاق میس ایله ساخسینی
دلی لر ایش اوسدن سالینسین
ائل واری اوغرودان آلینسین
دانیشسین ایش بیلن آیدینجا
یازیلار یازیلسین آچیقجا
ایشله ین امگین قازانسین
ایشلتسین اؤزونه قازانجین
یوخسوللوق ییغیشسین بیر یوللوق
گؤرسون ائل ساغلیق لا بیر بوللوق
گلمه سن ائل دورار ایاغا
قان دوشر یورد دوشر ایاغا
پیس آلار یاخشی لار یئرینی
ائلیمین سیندیرار بئلینی
قورقولار پوزولار یئنه ده
باش اولار اوغرولار گینه ده
سئوگی له بیلگینی قاتیشدیر
گوج ایله دوزلوگو یاپیشدیر
اؤلچو ائت وئر ائله ایشلنسین
پیسلیک له اگریلیک گیزلنسین
محمّداشراقی
