شعر آغلارام – محمد اشراقی
گئجه لر آغلارام یارالی دیلیمه
یوخلامیش ، آغگوندن آرالی ائلیمه
ائشیدین دئییرم سؤزومو ائللره
ایستیرم سالاسیز دوزونو تئللره
ائلیمده دیلیمدک دگرلی گؤزه لدیر
گوجیله دوزلوکده تایسیزدیر اؤزه لدیر
ائلیمین دویقوسو مینلر ایل قالقیسی
ناغیلی سایاسی بایاتی آغیسی
دادلیدیر دویماریق سئویملی دادیندان
چیخیری گئت گئده کوتله نین یادیندان
دیلیمین سؤزلری قیزیللا یازمالی
اسگیدیر مینلر ایل ائل ایچره قالمالی
ائلیمین اولدوزو ساچمالی یئنیدن
ایشیغین گؤیلره سالمالی یئنیدن
ائلیمله دیلیمی قورورام گؤزوم دک
دویمارام دادیندان سالخوملی اوزوم دک
داغلاری چاتارام ایگیدلر بئلینه
آختاریب تاپارام وئرگیلر ائلیمه
تانریدان ایسترم اویالتسین ائلیمی
سیخینتی دارلیقدان چیخارتسین دیلیمی
ال قولوم باغلیدیر توتولور اوره گیم
ایللردیر یوک آلتدا بوکولور کوره گیم
الرم»گونش« دک سؤزلریم چؤللره
آپارسین اسن یئل ایستگیم ائللره
