آی ایشیغی از اشعار محمد اشراقی
گئجه لر ایشیق سالار آی ایشیغی
یئر اوزونو آغ بویایار آی ایشیغی
گوموش الر دنیزلره آی ایشیغی
یولا سالار دالغالاری آی ایشیغی
آی چیخاندا گؤزه للشر باغ گؤركمی
گئییندیرر داغ اگنینه آغ گؤینكی
كؤنلو آچار پاریلدایان چای گؤركمی
كؤوشن لرین یاناری دیر آی ایشیغی
آی ایشیغی سئوگیسی دیر عاشیق لارین
جانلاندیرار عاشیق لارین چالقی لارین
درینلدر سئوگی لرین سایقی لارین
سئوگی لرین ایاغی دیر آی ایشیغی
آی ایشیغی قوناق گلر ائلیمیزه
ائل ده سالار چالقی لارین تئلیمیزه
چاغیریریق قوناق سیزی ائویمیزه
ائلیمیزین قوناغی دیر آی ایشیغی
تانری ائلی ایشیغیندان اونودماسین
یاخشیلیغین كؤكونو ائل قوروتماسین
سئومکیله سئویلمك دن یورولماسین
یوردوموزون سئوگیسی دیر آی ایشیغی
قولاق وئرین سیزه دئییم سئوگی لردن
قالقی لاردان یاخشیلیق لا وئرگی لردن
سئوگی لرین سؤزون آچان ائلچی لردن
اورگیمیز وئرگیسی دیر آی ایشیغی
