اوشاقلار شعری ترکی از محمد اشراقی
یارانیشین گول لری دیر اوشاق لار
یاشاییشین بزه گی دیر اوشاق لار
گله جگین قورقوسونو قورارلار
گئچه جگین اؤلچوسویله اوشاق لار
اوشاق لارین ایستک لرین بیلینیز
دویقو بیلیک اوجاغیندا پیشیریز
یاسا اینام گئییم ایله برکیدیب
گله جگین اتگینه یئتیریز
گئچن لرین یاخشی پیسین بیلسینلر
دوشونجه نین گوزگوسونو سیلسینلر
یاخشیلیغی اوشاق لارا تاپشیرین
باشاردیقجا یاخشی یولا گئتسینلر
اوشاق لارین گؤز قولاغی آچیق دیر
اؤیره نمگه دویقولو دور آییق دیر
تئز آلارلار پیس یاخشینی بؤیوک دن
پیس یاخشیلیق گئچن لردن قالیبدیر
آیریلیغی آرانیزدان گؤتوروز
اوشاق لاری بیر اؤلچوده بؤیودوز
بئله لیک له پیسلیک گئدر آرادان
سود له دولار یاشاییش دا گؤلونوز
تورکجه میزی اوشاق لارا اؤیردین
تورک ائلینه سئوگینیزی گؤسترین
«گونش» کیمی ایشیق سالین بو یولا
وارینیزدان دیل یولوندا ایشلدین
