ایشدیر دوشوب – محمد اشراقی

آج بیرکیشی تومانینی ساتیردی
گور سسیندن ائل قولاغی باتیردی
ایسته ییردی لوت ده قالسا پول تاپسین
یئمه گینه بیر ائونه لیک اون آلسین
دوشونمزین بیری گؤروب چاغیردی
آل بوقینی تومانی وئر باغیردی
توخون اولماز آج کیمسه دن خبری
آج اوتانسا اوزه چیخماز اثری
توخ اللشر اؤز وارینی ساخلاسین
آج چالیشار سویوق جانین آلماسین
توخ دئیرکی آجالمارام بیرده من
آج دئیرکی توخالمارام بیرده من
توخلوق قازار یییه سی نین کؤکونو
آجلیق توتار اینام دؤزوم گؤزونو
آج لا توخون سؤزو چیخدی اوجالدی
آج ، ال آچدی توخون گؤزون قارالدی
ایش یئتیشدی عدلیّه ده گؤروله
قاضی دئدی قولاق آسین سؤزومه:
آجین گره ک ایشی اولسون قازانسین
ایش سیزلیگ ین گونو گؤروم قارالسین
بیلیک له ایش چتین لری آچاندی
دینج لیگه یاخشی یول لار سالاندی
ایش دیر دوشوب آش دیر پیشیب باریشین
ایش له بیلیک آرتیرماغا چالیشین
عدالت ین «گونشینی» آختارین
ایشینیزله ائل ایچینده ساخلایین
اودو یالنیز اؤز اؤنوزه ائشمه یین
دیریلیک ده پیس لر یله دوشمه یین
بیرلیک اولسا ائل آغیریسی آزالار
یوخسول لارین کئفی آرتیق سازالار

نوشته های مشابه

دکمه بازگشت به بالا