باریش- محمد اشراقی
یاخشی انسان انسان کیمی یاشایار
انسان لارا انسان کیمی یاناشار
ائل لر دیل لر آیریلیغی گؤزه ل دیر
بو گؤزه للیک آیریلیق دان آیریلار
یئرین اوزو ائل لر اوچون باخچا دیر
ائل لر گولو دیل لریله آچیلار
ائل لر گره ک بیربیرینی تانیسین
سئویلسین لر آغ لا قارا ساری لار
یاد ائل لری تانیماساق قورخاریق
ائل لر یئرسیز اؤزلرینی قورویار
دؤیوش اولار جان لار ایتر وار گئدر
تمدن لر گول آچمامیش پوزولار
اؤزگه لری تانییاراق سایاق بیز
یولداش قارداش تانیناراق ساییلار
یاخینلاشسین ائل لر دینی فرهنگی
یاخینلیق لا اوره ک له دیل آچیلار
آغ سئومه سه قارا لاری ظولوم دور
سئوگی سیز ائل ، انسانلیق دان آیریلار
یهود گره ک عرب لری ازمه سین
عرب دورار یهودلاری داغیدار
ائل لر ایچره اوستون گؤرمک اولماسا
ائل لر دیل لر بیر- بیریله باریشار
ائل لر- دیل لر باریشسالار یاخشی دیر
ائل لر دوروب باریش ایچره یاریشار
ییرتیجی لار بیر- بیریله بوغوشسا
گوجلو توتوب گوجسوزلری بودایار
انسان گره گ بیرلیک ایچره یاشاسین
یاراشیق لار اوستونلوگو تانیدار
یئر بؤلگوسو ائلی- ائل دن آییرسا
فرهنگ لر آیری دوشوب داغیلار
ائل لر گره ک دیل فرهنگین ساخلاسین
دیل فرهنگی ازه ن لر دیر یاغی لار
دیل گؤسترر ائل دگرین گونش دک
ائل لر دیل له ائل لر ایچره تانینار
