بؤیومک – محمد اشراقی
انسان گره ک گونو گوندن بؤیویه
بؤیومه سی گؤز اؤنونده گؤرونه
بؤیومه سه دایانیبدیر وارلیغی
آرتار گونده چتینلیک له دارلیغی
بؤیومه نین نئچه یولو دونو وار
یول لارینین باشلانیش لا سونووار
اوشاق نئجه یاشایاراق بؤیویر
گؤرن لری انله نرک سؤیونر
بؤیوک لرده گره کلی دیر بؤیوسون
بؤیومه سی گؤز اؤنونده گؤرونسون
بؤیومگه ایستک ایله گوج ایستر
یاخشی بیلیک باشاریغی دوز ایستر
دیریلیگی دایانان لار اؤلرلر
دایانماق لا یوخسوللوغا دؤزرلر
بؤیومگی دوز چاغیندا باشلایان
ایستگینه چاتار دیبده آختاران
دایانان لار دیریلیک ده یاریماز
آغیر یاتان یوخوسوندان آییلماز
یاریمازلار ، اوتوزارلار وارلیق دا
عؤمور بویو یاشایارلار دارالیق دا
گونده بیریول باخ اؤزونون ایشینه
سال چیق اؤزون، ویر ایش لرین دیشینه
هاراداسان باخ هارایا گئدیرسن؟
ایش لری نین امگینی یئییرسن؟
یا قالمیسان دینجلیک ده بیر یئرده
کروان کؤچوب سن یاتمیسان بیر ائوده
کروان گئدر چاتار دیبده یئرینه
یاتان ایسه باخار اؤزگه الینه
اکن لرین توتار تانری الینی
اکمیین لر بیچنمزلر اکینی
