تانری اولاق- محمد اشراقی
گون شاخیری پنجره دن اوتاغا
پنجره ده باخیر ایشیق بویاغا
توی توتوبلار چیچک لرده قالی دا
گونش اوخشور قالی اوسته قوناغا
باغدا اسیر یئل اوینادیر یارپاغی
باشاچکیب آغاج ایپک پاپاغی
گول لر قوخور بولبول اوخور شنلیک له
خلورچی لر داشییری سامانی
آلوئر اولور ائل ایچینده اوبا دا
قوش لار یاتیب دینج قولاق یووا دا
سورو ناخیر اوتلاییری بیرلیک ده
قوجا ، قاری، یاخشی لارا دعادا
دیریلیگین دورو سویو آخیری
وارلیق گونو یئر اوزونه شاخیری
نه گؤزه ل دیر دیریلیگین آخینی
تانری دوروب اؤز ایشینه باخیری
گؤزللیک لر سایی ائل ده آرتمالی
پیسلیک لری ائل ایچیندن آتمالی
یاخشی لیق لا گؤزللیک لر تانری دیر
شیطان لیغین داشین بوتون آتمالی
یاشاییش دا هامی تانری اولاق بیز
ایشمیزه یاخشی تمل قویاق بیز
آیری ایش لر وئرگی دئگیل آغری دیر
آغری لاری ایچیمیزدن قوواق بیز
سئویلسه لر شن اوره ک له سئوگی لر
سئویلدیکجه آرتسا گؤزه ل ائتگی لر
شیطان قاچار تانری آلار یئرینی
آزلیق لارین یئرین توتار وئرگی لر
