جیران- شعر ترکی محمد اشراقی
داغ باشیندان اندی گؤزل بیر جیران
گؤزه ل لیگی گؤرن لری ائدن حیران
پامبیق یوکو آغ قارلارین ایچینده
سوزدو داغین انیش یوققوش دیکینده
آغ بوخاغی آسلانیردی بوینوندا
آغ کره نی چالخاییردی قوینوندا
آغزین آچیب مه له ینده دیلک دن
آناسینی چاغیراندا اوره ک دن
ائله بیلکی بولبول اؤتور باخچادا
یاکی قوخور بیر دسته گول تاقچادا
بیردن بیره اودلو گول له آچیلدی
سسی ایسه داغ دؤشونه یاییلدی
قارلار آخدی داغ باشیندان سئل کیمی
جیران اوچدو اوچوروم دان یئل کیمی
آغ بوخاغی بلنرکن قانینا
باشی آخیب دوشدو بیردن یانینا
اووچو باتدی داغ گؤزه لی قانینا
اؤپوب باسدی اؤز بالاسین باغرینا
آنا جیران دایانمیشدی اوتای دا
روح لا جانی قالمیشیدی بوتای دا
بیردن بیره اوجا سس له آغلادی
داغین قاری اووچو اوسته آغنادی
آنا جیران باخیب ایشی سان ائتدی
قانا دئمک ایکی قاتا قان ائتدی
