خاطره- شعر ترکی محمد اشراقی
یادیمدا دیر دوه چینی سؤکدولر
خیابانا داش ایله قوم تؤکدولر
دوز خیابان منجم دن سه راها
دؤندو گؤزه ل اوزون انلی بیر یولا
دوه چی نین آدی اولدو مصدق
نئچه گونده تخت دن دوشدو مصدق
بو ایش اوسته چوخ لی آدام قیریلدی
دئموکراسی ائوی دئمک ییخیلدی
یادیم دا دی مدرسه یه گئده ردوق
رادیووا یول دا قولا وئرردوق
دئیردیلر مصدقی یاشاسین
اؤلوم شاها ، اؤلوم شاهی آپارسین
چوخ چکمه دی شاه قاییتدی اؤلکه یه
دایانمیشدی ایش لرینده اؤزگه یه
(اؤلوم شاها) دؤندو (مصدق اؤلسون )
قورخ اوندا کی ائل بیرلیگی بؤلونسون
دئموکراسی باشلامیشدی اوگون لر
قویمادیلار یاراتدیلار دوگون لر
چوخ دان دی وار آزادلیغین ایستگی
آنجاق هله درین دئگیل بیلمه گی
ائلین گره ک دوشونجه سی چوخالا
کیچیک قورلار چئوریله بیر اوجاغا
اود دوشه دوز استبدادین گؤزونه
ائل ساخلایا آزادلیغین اؤزونه
اوستون اولسا چؤره ک دن ده آزادلیق
اؤزو گلر آباد لیق لا آزاد لیق
آزادلیغی ائل تانیسا قورویار
تانیماسا ساخلاماق دان یورولار
بوگئدیشی تاریخ بویو گؤروروک
بئله دیرکی آزادلیغی گؤزلوروک
آزادلیغی سووارماساق اؤله جک
یانارکیمی قوروماساق سؤ نه جک
ساخلایارلار آزادلیغی بیلن لر
تانیمازلار بو وئرگینی بیلمزلر
