سئوگی / عشق – اشعار ترکی محمد اشراقی
سئومه لی دیر دنیا بیزه سئوگیله
گئتمه لی دیر بو گؤزل یول وئرگیله
سئومه لی دیر سئوگی ایله یاشاییش
یازا* چؤنر سئوگی ایله قارا قیش
یارانیشین قوروجوسو* سئوگی دیر
ایستک لرین یوروجوسو* سئوگی دیر
سئوگیلی لر دیریلیگین دوزو دور
گوزللیک لر سئوگی لرین سؤزو دور
دینجلیک لر سئوگی ایله یارانار
یارادانسا* یالنیز سئوگی یارادار
پیسلیک ایله سئوگی اوستو اؤرتولر
پوزغونلاشار* سئوگی قوران دوزگولر*
کیم ایستییه دادین آلا وارلیغین
بیر یوللوغا داشین آتا دارلیغین
گرکلی دیر سئوگی ایله یاشایا
اوزگه ایله سئوگی ایله یاناشا*
سئوگیلی لر سئویلرلر اورک دن
سئوگی گلر بیلیکیله دیلک دن
سئوگیسیزلر پوزار دیبده وارلیغی
یارالدارلار سئوگی لره دارلیغی
سؤزلوک:
*یاز: بهار
*قوروجو: سازمان ده
*یوروجو: مفسر
*پوزغونلاشار: پریشان می شود
*دوزگولر : نظامات