انسان حقلری- اشعار ترکی محمد اشراقی
انسانین حقلری بللی دیر
پوزولسا آجیلی دردلی دیر
بوحقی گوجلولر پوزورلار
ائللری سینسیدیب یورورلار
آجلیقلا یوخسوللوق چوخالیر
دؤیوشلر چوخ یئرده جان آلیر
ظولومون قییناغی ایتیلیب
آزادلیق بوغازی بیچیلیب
بومبالار قیریری ائللری
یاندیریب ییخیری ائولری
آزادلیق گرک دیر چوخالا
بیلیکه دگر چوخ قویولا
ائل بیله گوجویله حقینی
چاتدیرا سؤزویله سسینی
دینجلیک اؤن اولا انسانا
عدالت یاییلا دنیایا
ظولومون کؤک لری قازیلا
عدالت گول لری آچیلا
دؤیوشون کؤزلری سؤنوله
یاشاییش ایزلری گؤرونه
تانرینین ایستگی دوغرولا
یئنی بیر قورقولار قورولا
تانرینین ایستگی سئوگی دیر
سئوگی ان اؤنملی وئرگی دیر
آرتیراق بیلیک له سئوگینی
پایلاشاق سئوگیله وئرگینی
گوبوردلوق کؤکونو قازدیراق
انسانین حق لرین قالدیراق
