ادب یاشاییش اؤلچوسو- اشعار ترکی محمد اشراقی

ادب لی یاراشیق یییه سی ساییلار

یاراشیق آدامی حئیوان دان آییرار

ادب دیر انسانا یاشاییش اؤلچوسو

ادب لی ساییلار یاشاییش گوزگوسو

ادب لی بیلرکن اؤزگه نی اینجیتمز 

اؤزگه نین ایشیله سؤزوندن اینجیمز

باشارسا کؤمکلیک ائله یر هامییا

سئورکی هامی اؤز ایشینده  یارییا

ادب لی ساواشماز کیمسه یله وارلیق دا

یولداشین قویمازکی دایانسین دارلیقدا

اؤزگه نین پیسینی ایسته مز ادب لی

اؤزگه نین ایشینی پیسله مز ادب لی

ادب لی هامی نین سایقیسین ساخلایار

اؤزگه نین سایقی سیز ایشینی سایمایار

ادبین آزلیغی آغری دیر ائل لره

ادب له یولداشلیق یاییلار ائو لره

هارادا ادب لی چوخ اولسا دینج اولار

ادب له شن گلر، قوجالار گنج اولار

چالیشاق ادب له یاخشیلیق یارالداق

پیسلیگین ساییسین ادب له آزالداق