آذربایجان یازی- اشعار ترکی محمد اشراقی

جنّتی گؤرورم یوردومون یازیندا 

چؤلونده باغیندا آخارسو چاییندا 

داغیندا یاتان قار اریییب سو اولار

چؤللری سوواریب دنیزلر دولدورار 

باغلاری آغارار گول چیچک ایچینده 

گول آچار انیشی یوققوشو دیکینده 

یازگونو گؤیرتی بورویر هریانی 

بزه یر شهری کندله  اوبانی 

اود بیتر یایلاقدا  شئه توتار اوزونو 

بویایار یاشیلا دره سین دوزونو 

اوتلاقلار اوزونه لاله لر دوزولر 

یاییلار چؤللره ناخیرلار سورولر 

یئل اسر اوشودر بو یئرده گزنی 

آییلدار یوخودان ، گئدنی گلنی 

اَلنر گول چیچک آغاجلار اوستوندن 

بزَنر قالی دک یئر اوزو گولوندن 

قوشلارلا سسلَنر چالقیسی وارلیغین 

بیلدیرر گئتمه گین قیش گونو دارلیغین 

ایلَشن دینجَلر یازگونو باغلاردا 

دینجَلدر گول اییی یورقونو داغلاردا 

یوردومون بیر باغین وئرمرم جنّته 

قویسالار یاشارام دوشمرم منّته 

»گونش« دک سرمه سن اؤزونو داغلارا 

چای کیمی آخماسان چؤللرله باغلارا 

دئسمده بیلمزسن سؤزومون دوزونو 

گره کدیر گؤرسن یوردومون اؤزونو