ارکیم

ارکیم

 اوخشاییرام ارکیم سنون بویونا بیل

گره کلی دیر اوجالوغون قورونا بیل

ساییلیرسان یوزلر ایلین یادگاری

ائلیمیزین اوجا هوندور افتخاری

هربیر شهرین گؤزه گلیم نشانی وار

تبریزین ده سنین کیمی نمادی وار

گؤستریرسن ائلیمیزین گوج لرینی

دانیشیرسان دیلیمیزین سؤزلرینی

دوزه لیبسن مینلر کیشی واری ایله

قاریشیبدیر داش تورپاغین قان ایله

باشین اگر سحر سنه گون چیخاندا

قاشین ویرار آقشام اوستو گون باتاندا

– ائلیمیزین غروروسان گؤزه ل ارکیم

یوردوموزا اوغورلوسان اؤزه ل ارکیم

ایل لر بویو دایانمیسان گینه دایان

افتخارلا دولانمیسان گینه دولان

ائل آلیری وارلیغیندان منلیگینی

دیل تاپیری ساغلیغیندان شنلیگینی

یازاجاقلار  یوزلر ماهنی شاعرلرین

چالاجاقالار یوزلرچالقی عاشیقلرین

سنی وار اول اوزون یاشا اوجا ارکیم

گلن لره سئوگی آپار قوجا ارکیم

محمّد اشراقی

1395/8/18