ایستک لریم – محمد اشراقی
ایسته ییرم دنیا سیزی یورماسین
عؤمور گولوز آچیلمامیش سولماسین
سولار آخار داغ دره دن آشاغی
دیریلیک ده سویوز ترسه آخماسین
بیلیجی لر اوخودوغون دوشونسون
سؤزو اگیب آیری یئره یورماسین
تاری سؤزون قول سؤزونه قاتاراق
اگری سؤزو دوز یئرینه ساتماسین
بیلیک له عقل اؤلچو اولسون ایش لره
ائلین عقلی یالان لارا اویماسین
اخلاق لا دین یوموشالتسین انسانی
گوبوردلاری قانون الی یونتاسین
هنر الی فرهنگ له بیرلیک ده
انسان لیغین پیس لیق لار دان ساخلاسین
ریاچی لیق یول اولوبدور قازانجا
بئله یولو گؤروم سونا چاتماسین
پول اولوبدور اؤلچو ائله بو گون لر
سئوگی یئرین پول اؤلچوسو آلماسین
آتا آنا سئویلیری واریله
آتا آنا بئله یولون آزماسین
ائل یوخلاییب بختیم کیمی درین دن
ائلی گؤروم بختیم ایله اویانسین
آییق گؤزله باخسین بیر آز اوزاغا
گجه جگین ایستک لرین اینانسین
ائل دانیشسین ایسته دیگی سؤزلری
اوره ک لرده گیزلین بیر سؤز قالماسین
نئجه انسان قورخمایاراق ایشله یر
دوشونجه سین دئمکدن ده قورخماسین
ائل سئوه رلیک اوره ک لرده دیریلسین
ائلین اوغلو اؤز ائلینی دانماسین
دولاندیرار اؤلکه لری کفر الی
ظلم الینده هئچ بیر اؤلکه قالماسین
وار گؤتورسون معنویت بوروسون
اؤلکه میزی، ظولوم یورد دا قالماسین
ظالم گؤزو عدالت له قیریلسین
مظلوم لارا دوروب اگری باخماسین
باغلی قالسین عدلیّه لر قاپیسی
قاضی لاری ایش سیزلیک دن آغلاسین
رشوه آلماق ییغیشیلسین اؤلکه ده
رشوه ییین کؤکو یئرده قالماسین
اسکیک ساتان باها وئرن آلوئرچی
پیسی قاتیب یاخشی ایچره ساتماسین
دگرلنسین بوتون ایش لر اؤلچو ایله
دگرسیز ایش یئر اوزونده آرتماسین
دگرلی ایش اسکیک اولوب دالی دیر
یاخشی دیر کی آرتیق دالی قالماسین
آلدیغیجا ایش ایشله سین ایشچی لر
باشین یالنیز اؤز ایشینه قاتماسین
اداره لر ائل ایشینه یئتیشسین
ائلین ایشی اداره ده یاتماسین
باشاریق لا، بیلیک ، ائلی دیرچلدر
ائلی گؤروم بو ایکی سین آتماسین
گئجه گونوز اؤیره نرک اؤیره دک
اؤیرنمگه مکتب لر پول آلماسین
معلّمین پولو اولسون جیبینده
الف بئیه ائلی توتوب سویماسین
ایشلییه سیز گئجه گونوز اؤلکه یه
ائل ایشینده دانلاق سیزی یورماسین
ایش چوخالسین اکینچی لیک گوجله نسین
یئر اوزونده آج بیر قارین قالماسین
چتین ده دیر اؤلکه میزده چوخ لاری
چتین لیک ده کیمسه گؤروم قالماسین
پولسوز باخسین حکیمیمیز خسته یه
خسته لردن درمانسیزی اولماسین
یاش لار آرتسین آزی چاتسین دوخسانا
خسته خانا آدین کیمسه توتماسین
هامی گئتسین باشاردیغی ایشینه
باشارمازلار ائل ایشینی بوشلاسین
توپ توفنگین بوغازلاری قوووشسون
اؤلدورمگه موشک یئردن قاخماسین
قوشونوموز دیرچلره ک گوجلنسین
دشمن قوشو گؤیوموزده اوچماسین
قوشون خرجین دینجیلیگه ایشلتسین
باریش اولسون دؤیوش آدی توتماسین
تورکو دیلی گوجلو دیل دیر گوجلنسین
تورک ائلیمیز اؤز دیلینی آتماسین
گونده بیرسؤز تورک دیلینده یازاق بیز
اؤزگه دیل لر باشیمیزی قاتماسین
دیلیمیزده یازی پوزو چوخالسین
تورکجه میزده دیرچلیشدن قالماسین
سؤز چیچک دیر ائل چیچک لیک شاعره
چیچگیم له چیچک لیگیم سولماسین
سؤزو چوخدور گلن لره «گونشین»
قیسالدیری اوخویانی یورماسین
