اؤلچولر- محمد اشراقی

انیله بوی درینلیک له اوجالیق
قیسسا آغیر اینجه یوغون یوخالیق
اؤلچولر دیر ایشیمیزده گره کلی
اؤلچولو ایش گؤرکملی دیر دگرلی
اؤلچوسوز ایش دگرسیز دیر چوخ یئرده
یئرسیز چیخار اؤلچوسوزلر آل وئرده
دانیشیق لا یازی پوزو گؤروش لر
باریشیق لا ، آجیلیق لار دؤیوش لر
بیلیک بیرده اؤلچو ایله اولمالی
باشاردیقجا بولارا گوج قویمالی
یوخسا ایش لر قاریشاراق پوزولار
ایشلینین ال لری بوش یورولار
وارلیق بوتون اؤلچو ایله قورولوب
یارانیشا سایسیز قوروق قویولوب
گؤرونمه ییر پوزغون بیر ایش وارلیق دا
اؤلچوسوزلر دایانارلار دارلیق دا
تانری سیزه اؤلچو اولسون ایشله یین!
پیسلیک ندیر؟ آغری ندیر ؟ بیلمه یین!

اؤلچو سؤزون قیزیل ایله یازمالی
قاپی باشی گؤز اؤنونه آسمالی
ایشین سونون قاباقجا دان سئچینیز
«گونش» کیمی اؤلچو ایله گئچینیز

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

دکمه بازگشت به بالا
بستن