بیرآز تئزگل – محمد اشراقی
ایل لر بویو آختارمادا گؤزوم سنی
گونده یوز یول سسلندیریر سؤزوم سنی
یورولاندا پیس الیندن ائل لریمیز
دئیر تانری تئز یئتیرسین گؤروم سنی
گؤزل آدین عدالتین جارچیسی دیر
گؤزله مگین دیریلیگیم چالقیسی دیر
کفریله ظلم ییغیشیلار سن گلنده
بو یاخشی گون انسانلیغین آرزیسی دیر
اوزون عؤمور مهدی(ع) یازیب تانری سنه
دؤیونورو یاخشی لارین باغری سنه
قرآن دئییب یاخشی بنده گله جکسن
بیرآز تئزگل قوی دیمه سین آغری سنه
یاخشیلیق لار غنچه لنیب گول لر آچسین
اینام کؤکو اوره ک لرده قول لار آتسین
پیسلیک گئتسین ائل قورتولسون قاراگوندن
حق گونشی یئر اوزونه ایشیق سالسین
تانری ائتمه اوزاق بیزی اینامیندان
وحی ین سؤزو دین ین گؤزو قرآنیندان
اونوتماگل بیر آن بیزی سنی مهدی (ع)
آیری سالما صاحب زمان امامیندان(ع)
