پول گرکمز-محمد اشراقی
قورخوم بودور لای لایین لا یاتانمایام
سن وئردیگین آغ بوغدانی دارتانمایام
چالیشیرسان بیرالینله یوخلاداسان
او بیری له وار یوخومو تالایاسان
بئله دیرکی گئجه گوندوز ایشلیرم من
مازالاق تک باشیم اوسته بیتیرم من
آنجاق الیم خمیرلی دیر قارنیم آج دیر
منه قالان اوزون ارسین اودلو ساج دیر
بئله اولماز ائل ایشلییه وارلی یئیه
یاخشیدیرکی بیلیک بیزه یولو دئیه
پول گرکمز پول گتیره ایشلمه میش
پول گتیرن گره ک اولسون بیلیک له ایش
یوخسا ائلین گونو قارا اولمالی دیر
اؤلکه یئنه کؤچدن گئری قالمالی دیر
بئله گئتسه ایش آزالار ایشسیز آرتار
دگیرمان دا یالنیز وارلی دنین دارتار
یوخسوللوغون چتین لری چیخار اوزه
اوغرولوغون سایی گونده چاتار یوزه
ایش گلیری قارین لاری دویورانماز
آج چوخالار یوخسول لاردا اینام اولماز
دینج لیگ ین دوواری لاپ آلچاق اولار
ایش یئرینه اؤلکه میزده چال چاپ اولار
بیر قیرانا ییرتیجی لار قان لار تؤکر
پیسلیک آرتار ائولر ییخار دام لار سؤکر
عدالت ین گونشینی بولود اؤرتر
ظلمون داشی بیر نسیلین عؤمرون سورتر
