آرزی- اشعار ترکی محمد اشراقی
ایل لر بویو آختاریرام گولوم سنی
ایسته ییرم بیر گون گؤرم گؤزوم سنی
گونده بیر دون گئیینیرسن گؤروشنده
دادون ایسه دئییشیری اؤپوشنده
اوشاقلیقدا اؤزوم کیمی اوشاقیدون
اویونجاقلا بویالی بیر اوفاقیدون
گؤروشردون آنا آتا قوجاغیندا
قیشین گونو ائوین ایستی اوجاغیندا
سنده منله ایاقلاشیب بؤیویردون
گنج چاغی سئوگی ایله دؤیونردون
ایزینیله اوجا داغلار باشین گؤردوم
چتینلرده الیم چاتماز یاخین گؤردوم
آیریلمازسان یاشاییرسان اؤزوم ایله
گویلوم ایستیر گؤرم اؤزون گؤزوم ایله
قوجالسام دا وارلیق اولوب آرزی منه
سندن اوزاق دارلیق اولوب آغری منه
ایسته ییرم الیم چاتا اللرینه
قولاق آسام شیرین دیللی سؤزلرینه
دئیه سن کی آرزی ائله سن اؤزونسن
بئله دیرکی باشدان دیبه سن دؤزومسن
۱۳۹۸/۲/۶
سؤزلوک:
* دادون: لذت
*ایسه: و
* اویونجاقلا: با اسباب بازی
* بویالی: رنگین
*اوفاق: کوچک
* ایاقلاشیب : همراه شده
*بؤیویردون : بزرگ می شدی
* دؤیونردون: قلبت می زد
*آیریلمازسان: جدا نمی شوی
* ایزینیله: بدنبالت
*الیم چاتماز: خارج از دسترسم
* آرزی: ایستک
* آغری : درد
* قولاق آسام : گوش بدهم
* ائله : همان –
*بئله دیرکی : اینست که
*باشدان دیبه سن : سرتاپا
* دؤزومسن : صبری
*گونده بیر دون گئیینیرسن : هر روز یک لباس می پوشی
