یالانچیلار – اشعار ترکی محمد اشراقی
دوزو قویوب یالان دیین یالانچیدیر
دوز اوستونه اؤرتوک چکن یالانچیدیر
یالان باخان یالان دویان یالان دیین
دوز یولوندا اگری گئدن یالانچیدیر
اورگیله گؤردوگو ایش بیر اولمایان
سؤزو اوسته دایانمایان یالانچیدیر
یول اوستونده یولچو سویان کیمسه دنده
گرچکلری دئییشدیرن یالانچیدیر
فرهنگینی دوشونمین دوشونجلی
آزغین دوشوب یولون آزان یالانچیدیر
اؤزلرینی بیلیک دولو دنیز بیلن
توکلو قولاق بیلیجیلر یالانچیدیر
خرافه دن یاشاییشا اؤلچو بیچن
یوخوسوندا داری گؤرن یالانچیدیر
ایشلممیش دیشلمیه نسخه یازان
بوش توربادان آرپا اومان یالانچیدیر
یاخشی اولاق پیسدن قاچاق دئین کیمسه
گؤزدن اوزاق پیسلیک ائدن یالانچیدیر
ایش آدینا مزد آلاراق ایشلمیین
گؤز اؤنونده اوغرو اولان یالانچیدیر
درس آدینا یورقونلوقدان مولگو ویران
معلملر اسکیک ساتان یالانچیدیر
ایش گؤرمه ییپ،گون گئچیرن بؤیوک باشلار
ائل وریانین سویا وئرن یالانچیدیر
مجلسلره گؤندریلن ائلچیلردن
ائل سؤزونو دانیشمایان یالانچیدیر
ائل سسیله اؤلکه میزده باشچیل اولان
ائل وارینا تالان ویران یالانچیدیر
ائل سئورلیک آتین مینن گؤستریجی
ائل سوروسون دوز سورمین یالانچیدیر
ائل وارینی آلتا ییغیب باهالادان
یزید کیمی سوباغلایان یالانچیدیر
وارلی اولوب دونیا وارین قینایاراق
واردالیجا هودو گئدن یالانچیدیر
طاماحکارلار آلدانارلار یالانچییا
آرتیق طاماح ائوین ییخان یالانچیدیر
گونش دئییر ایستیمیزه سویوق قاتان
کؤکوموزو دیبدن قازان یالانچیدیر
