بولاق- اشعار ترکی محمد اشراقی

گؤزوم دوشوب بیر بولاغین سویونا

کؤنول ایستر سویونا بیر یویونا

گؤزیاشی تک قوملار اوسته آخیری

گؤزه دوروب آخینینا باخیری

ایشمه لی دیر دومدورور دور یونگولدور

یونگوللوگو بولاقلارا اولگودور

قیزلار گلیب چئوره سینده سویونار

گؤزگؤز ائدیب گؤزه سینده یویونار

دوروب باخار بویلارینا کوزه لر

سویون کئفی سئوگی ایله دوزَلر 

قیزلار سودا اؤزلرینه اؤیونر

بولاق ایسه آخماسینا سؤیونر